هو انا مجنونة

بقالي فترة طويلة مصحيتش وعاوزة اكتب
وكأني مشتاقة لمج " نسكافيه"
او جعانة لحاجة مسكرة
الفترة اللي فاتت كنت باصحى من النوم
افكر في الامتحان اللي جاي
عادة انا باطلق على كل شهر شعار
زي شعارات الساقية كده
مثلا شهر التجميع
او شهر المناسبات
حاسة اني سعيدة باللي وصلت له
وهاكون اسعد باللي جاي إن شاء الله
خايفة م الصعب وقلقانة
ساعات باكون بردانة
واحس اني لوحدي
بس كوني لوحدي
مبيبقاش وحش قوي
شغال برضه
خصوصا
وانا اهو على اول سلمة في تحقيق حلمي
سنة كمان وهدخل انشاء الله كلية اعلام
بس امبارح بقا بالذات
حاجة جميلة قوي حصلت
رجعوا عيوني يلمعوا
الصبح وانا بابص في المراية
اتفاجأت
مكنتش مصدقة انه عنيا بيلمعوا زي زمان
ضحكت لقيتهم لمعوا اكتر
وسعت ضحكتي اكتر واكتر
بعد الامتحان قابلت دنيا
بصت لى باستغراب وقالتلي
هما عيونك اخضروا
ضحكت
سألتها : حاسة انهم متغيرين
قالت لي : حاسة انهم جايبين على خضار
قلت لها : لاء اصلهم رجعوا يلمعوا تاني النهاردة
مش حب
بس مش عارفة ايه ؟
يمكن كهربا
حلم
زهق من الحزن والقلق
وانا راجعة في الميكروباص
كنت باضحك على خناقة
ناس متعصبة وبتشد مع بعضها
على حاجات هايفة
وانا باضحك وبحاول اداري وشي
عشان ميقولوش مجنونة

قضية اليوم المطروحة للتصويت

هل أنا مجنونة ؟
نعم
لا
أحيانا