نصايح عمتى

اوعى تنسى اى حاجه حصلتلك فى الماضى

ماتأمنيش بأى حاجه الا بحقيقتك و لما تلاقيها خليكى معاها لحسن تتوه منك تانى

دايما افتكرى نفسك و انت صغيرة و افتكرى كنت بتحلمى بإيه و حاولى تحققيه

عمرك ما هاتحسى براحه الا لما تحققى احلامك الصغيره

خليكى شجاعه و جريئه طول ما انت متأكده من الحق. اوعى تنامى و انتى حاسه انك خايفه من حاجه و لا من حد. علشان تبقى مستريحه

لما تبقى عاوزه حاجه من الحياة متستنيش حد يديهالك و لا القدر علشان انت طيبه و كده ما حدش هايديكى غيرك لما تحبى حاجه خديها انتى بنفسك او على الاقل حاولى تاخديها عشان الحياه كدا

خليكى من جوه زى من بره خليكى شفافه متصالحه مع نفسك. ده هايديكى قوة و طاقه داخلية و خارجية كبيرة جدا. كل الجدران بين حقيقتك و اللى الناس شايفاه ده بتقلل من طاقتك و روحك على الحياة

خليك متسامحة دايما بس مش ضعيفة و ما تشتغلش نفسك فى ده لحسن ده من الحاجات اللى بتبوظ

حاولى من فترة للتانية تجربى جنونك. كل الافكار المجنونة اللى بتعدى على دماغك من وقت للتانى اطلقيها على العالم والناس. اللى بيحبوك بجد مش هايزعلوا و الباقى مش مهم

فكرى دايما بإيجابية فى الحياة و خلى عندك هدف مرتبط بإيمان بحاجه معينه مهما كانت. لو مش لاقيه ادى لحاجه معينه الاهمية ده علشان تلاقى سبب انك عايشه

لازم ترجعى للحب الحقيقى فى حياتك